خزمەتگوزارییەکانمان

ئەم هۆڵە بۆ ٣٠٠ کەس ئامادەکراوە، سیستەمی ئەندازیاریی دەنگ و ڕووناکی تێدا جێگیر کراوە، تا باشترین دەنگ و دیمەن بە ئامادەبووان بگەیەنێت. هۆڵەکە بە شێوازێک ڕێکخراوە کە گونجاو بێت بۆ نمایشی فیلم، کۆنسێرت، شانۆگەری و بۆنەکانی تر، هەروەها لە ڕێگەی ژووری کۆنترۆڵی تایبەتەوە، دەتوانرێت کارە هونەرییەکان بە شێوەیەکی پیشەییانە تۆمار بکرێن.

ئامێرەکانی دوو ستۆدیۆی تۆمارکردنی دەنگ بە بەرزترین کوالێتیی دیجیتاڵ و ئەنەلۆگ، لەگەڵ چەندین جۆر مایکرۆفۆنی تایبەت بۆ بوارە جیاوازەکان ئامادەکراون. لێرە گرنگی بە وردەکارییە تەکنیکییەکان دراوە تا بەرزترین ئاست لە تۆمارکردنی مۆسیقا، دۆبلاژ و دەنگی فیلمدا بەدەستبهێنرێت.

مەکۆیەکی زانستییە بۆ ساغکردنەوەی ئەو پڕۆژە و توێژینەوانە تەرخان کراوە کە خزمەت بە زمان، مێژوو و ناسنامەی کەلتووریی گەلەکەمان دەکەن. لێرەدا هەموو ئەو بابەتانەی پێشکەش دەکرێن، لەلایەن لیژنەیەکی کارامەوە وردبینییان بۆ دەکرێت، تا لە ڕووی ناوەرۆک و کوالیتییەوە لەگەڵ پێوەرە زانستییەکاندا بگونجێن.

بەکارهێنانی کەرەستەی شیاو و چاپکردن لەڕێگەی ئامێری پێشکەوتوو، دڵنیایی مانەوەی بەرهەمەکان بۆ ماوەیەکی درێژ دەدات. لێرە چاپکردن تەنها قۆناغێک نییە، بەڵکو تەواوکاری بەشی لێکۆڵینەوەیە، دوای پێداچوونەوە، چاپێکی نموونە دەخرێتە بەردەست.

بەرهەمەکانمان لە هەردوو ناوەندی سلێمانی و دهۆک بەردەستن، هاوکات، کار بۆ پەرەپێدانی سیستمێکی پێشکەوتوو دەکرێت تا لە داهاتوودا، هەر لە ڕێی ماڵپەڕەکەمانەوە، داواکردن، کڕین و گەیاندن بە شێوازێکی خێرا و سەردەمیانە بکرێت.

کتێبخانەکەمان سەرچاوەیەکی دەوڵەمەندە بە بوارەکانی مێژوو، فەرهەنگ و کەلەپووری گەلەکەمان. ژینگەی کتێبخانە بە شێوازێک ڕێکخراوە تا ببێتە شوێنێکی ئارام بۆ خوێندکاران و توێژەران. لێرە هەزاران سەرچاوەی دەگمەن بەردەستن.

ئەرشیڤەکەمان گەنجینەیەکی دەنگ و ڕەنگی کوردییە، خوێندکاران و توێژەران دەتوانن بۆ سەرچاوە و زانیارییەکان، سوود لەم ئەرشیڤە دەوڵەمەندە وەربگرن بۆ هەر پڕۆژە و داهێنانێک کە خزمەت بە کەلتووری کورد بکات.

ئێرە ناوەندێکە بۆ پەرەپێدانی ئەو پڕۆژانەی لە خەمی پاراستنی فەرهەنگی کوردیین. ئەوانەی ئەرشیڤ و بەڵگەنامەی دەگمەنیان لایە، دەتوانن لێرە کارەکانیان بکەنە بەرهەمێکی زانستی و هونەری بە کوالێتییەکی جیهانی.