دەربارەی ئێمە

ئینستیتیوتی کەلەپووری کورد ساڵی ٢٠٠٣ لەلایەن هونەرمەند "مەزهەر خالقی"یەوە دامەزراوە. ئێمە لە بنکە سەرەکییەکانی سلێمانی و دهۆک، وەک ناوەندێکی زانستی کار دەکەین بۆ پاراستنی کەلتووری زارەکی و ناسنامەی نەتەوەیی هەموو پێکهاتەکانی کوردستان. ئەرکی ئێمە کۆکردنەوە و پاراستنی ئەو میراتە دەوڵەمەندەیە کە لە باووباپیرانمانەوە بۆمان ماوەتەوە، تا لە ڕێگەی لێکۆڵینەوەی زانستییەوە وەک سەرچاوەیەکی بڕواپێکراو جێگیری بکەین.

بڕوای تەواومان وایە کە کەلتوور تەنها گەڕانەوە بۆ ڕابردوو نییە، بەڵکو بنچینەیەکە بۆ بونیادنانی داهاتوو. بۆیە تەنها بە ئەرشیڤکردن ناوەستین، بەڵکو بە بەکارهێنانی تەکنەلۆژیای هاوچەرخ و چاپکردنی بەرهەمی زانستی، کار دەکەین بۆ زیندووکردنەوەی شوناسی نەتەوەیی و گەیاندنی بە نەوەکانی داهاتوو.

تێکۆشانی ئینستیتیوت لە کتێبخانە و ئەرشیڤی دەنگ و ڕەنگەوە تا ستۆدیۆکانی بەرهەمهێنان و چاپخانە دەگرێتەوە. ئێمە ساڵانە پڕۆژەکانی خۆمان لە بواری لێکۆڵینەوە، چاپ و بەرهەمهێنانی هونەری جێبەجێ دەکەین. هەروەها، سەرپەرشتی و ئاڕاستەی ئەو هەوڵە زانستییە هاوبەشانەش دەکەین لەگەڵ توێژەران و دامەزراوەکاندا کە بۆ فەرهەنگی کوردی ئەنجام دەدرێن.